*कोविड लसीचा पहिला साठा ठाणे जिल्ह्यात दाखल*
ठाणे दि. १३- कोविड १९ आजारावरील 'कोविशील्ड' या लसीचा पहिला साठा आज पहाटे ४.३० वा. जिल्ह्यात दाखल झाला आहे.दिनांक १६ जानेवारी २०२१ रोजी लसीकरणास प्रारंभ होणार आहे अशी माहिती जिल्हाधिकारी राजेश नार्वेकर यांनी दिली.
विशेष वाहनाने ही लस ठाणे येथे आणण्यात आली. उपसंचालक कार्यालय मुंबई मंडळ ठाणे येथे हा साठा पोहोचविण्यात आला आहे.
पुण्यातील सिरम इन्स्टिट्यूट कडून ठाणे मंडळासाठी सुमारे १ लाख ३ हजार डोस उपलब्ध करुन देण्यात आले आहेत. यापैकी ठाणे जिल्ह्यासाठी ७४ हजार डोस उपलब्ध झाले आहेत. या ठिकाणाहून ठाणे जिल्ह्यातील २९ निर्देशित लसीकरण केंद्रांमध्ये ही लस पोहोचवण्यात येईल. उपसंचालक डॉ गौरी राठोड, जिल्हा शल्य चिकित्सक डॉ कैलास पवार, जिल्हा आरोग्य अधिकारी डॉ. मनिष रेंघे हे लसिकरण मोहिमेचे पुढील नियोजन करीत आहेत.
